मुंबईकडे जाणाऱ्या ट्रेनची धडक बसून खेडनजीक रेल्वे बोगद्यात मजूर ठार

अन्य दोघे गंभीर जखमी ;  रेल्वे कडून अपघाताची चौकशी

रत्नागिरी : कोकण रेल्वे मार्गावर खेड रेल्वे स्थानकानजीकच्या अलसुरे येथील बोगद्यामध्ये केबलचे काम करणाऱ्या मजुरांना मुंबईकडे जाणाऱ्या रेल्वे गाडीची धडक बसून एक मजूर मृत्युमुखी  पडल्याची माहिती मिळाली आहे. या अपघातात अन्य दोन कामगार  गंभीररित्या  जखमी झाले. सोमवारी सायंकाळी साडेतीन वाजण्याच्या सुमारास ही दुर्घटना घडली.

या संदर्भात उपलब्ध झालेल्या माहितीनुसार कोकण रेल्वे मार्गावरील खेडजवळील रेल्वे बोगद्यात केबलचे काम सुरू होते.  या दरम्यान मुंबईकडे जाणाऱ्या रेल्वे गाडीची धडक बसल्याने दोन कामगार गंभीर जखमी झाले तर एका कामगाराचा मृत्यू झाला आहे. या दुर्घटनेत मृत्यू पावलेल्या कामगाराचे नाव वाय. टी. राठोड  (५५, हवेरी, विजापूर- कर्नाटक ) असल्याची माहिती मिळत आहे. हे सर्व कामगार कर्नाटकमधील विजापूरचे असल्याचे समजते.

अपघाताची माहिती मिळताच खेड पोलीस घटनास्थळी दाखल होऊन त्यांनी या घटनेचा पंचनामा केला आहे. हा अपघात नेमका कशामुळे घडला, याची चौकशी कोकण रेल्वे प्रशासनाकडून केली जात आहे.

• हे सुद्धा वाचा : मुंबई-मडगाव वंदे भारत एक्सप्रेसच्या मंगळूरूपर्यंत विस्ताराला प्रखर विरोध
• Konkan Railway | रेल्वेच्या यूटीएस ॲपवर ऑर्डिनरी श्रेणीतील तिकीटेही मिळू लागली!
• कोकण रेल्वेच्या खेड स्थानकावरून कंटेनरद्वारे मालवाहतुकीचा शुभारंभ