खेड तालुक्यात सहकारी संस्थांच्या सभासदांसाठी मोफत नेत्र तपासणी शिबिर

• ‘सेवा संकल्प अभियान’ अंतर्गत स्तुत्य उपक्रम; ११७ सभासदांनी घेतला लाभ, ज्येष्ठ नागरिकांच्या तपासणीने शिबिराचा प्रारंभ

रत्नागिरी, दि. ८ : सहकार चळवळीच्या माध्यमातून सभासदांच्या आरोग्याची जपणूक करण्याच्या उद्देशाने, ‘सेवा संकल्प अभियान’ अंतर्गत खेड येथे सहकारी संस्थांच्या सभासदांसाठी मोफत नेत्र तपासणी शिबिराचे यशस्वी आयोजन करण्यात आले. सहाय्यक निबंधक, सहकारी संस्था, खेड आणि खेड तालुका पतसंस्था फेडरेशन यांच्या संयुक्त विद्यमाने हा सामाजिक आरोग्याचा उपक्रम राबविण्यात आला.
या विशेष शिबिराचा प्रारंभ एका ज्येष्ठ नागरिकाच्या नेत्र तपासणीने अत्यंत आदरपूर्वक वातावरणात करण्यात आला. सहकार क्षेत्र केवळ आर्थिक देवाणघेवाणीपुरते मर्यादित न राहता सभासदांच्या जीवनमानाशी आणि आरोग्याशीही जोडले गेले पाहिजे, या भावनेतून हे शिबिर आयोजित करण्यात आले होते.
११७ सभासदांचा उत्स्फूर्त सहभाग
शिबिरामध्ये खेड तालुक्यातील विविध सहकारी संस्था, पतसंस्था आणि सेवा सोसायट्यांच्या सभासदांनी मोठ्या संख्येने उपस्थित राहून तपासणी करून घेतली. या शिबिरात एकूण ११७ सभासदांच्या डोळ्यांची सखोल तपासणी तज्ज्ञांमार्फत मोफत करण्यात आली. दृष्टीदोषांचे वेळेत निदान आणि डोळ्यांची योग्य निगा याविषयी उपस्थितांना आवश्यक मार्गदर्शनही करण्यात आले.
‘सेवा संकल्प अभियान’ अंतर्गत सहकार विभाग आणि पतसंस्था फेडरेशनने घेतलेल्या या संयुक्त पुढाकाराचे तालुक्यात सर्व स्तरांतून स्वागत होत असून, सभासदांकडून या आरोग्यदायी उपक्रमाबद्दल समाधान व्यक्त करण्यात आले.