‘मुख्यमंत्री समृद्ध पंचायत राज अभियाना’त गुहागरच्या खामशेत ग्रामपंचायतीचा राज्यात गौरव
- द्वितीय क्रमांकाचा मानाचा पुरस्कार
- नाशिक येथील दिमाखदार सोहळ्यात मुख्यमंत्र्यांच्या हस्ते सन्मान
रत्नागिरी : शासकीय योजनांची प्रभावी अंमलबजावणी, पारदर्शक कारभार आणि लोकाभिमुख उपक्रमांच्या जोरावर गुहागर तालुक्यातील खामशेत ग्रामपंचायतीने ग्रामविकासात उल्लेखनीय कामगिरी करत संपूर्ण महाराष्ट्रात जिल्ह्याचा नावलौकिक वाढवला आहे. ‘मुख्यमंत्री समृद्ध पंचायत राज अभियान २०२५-२६’ अंतर्गत खामशेत ग्रामपंचायतीला राज्यात द्वितीय क्रमांकाचा बहुमान मिळाला असून, नाशिक येथे आयोजित राज्यस्तरीय शानदार सोहळ्यात मुख्यमंत्री देवेंद्र फडणवीस यांच्या हस्ते हा मानाचा पुरस्कार प्रदान करण्यात आला.
या ऐतिहासिक यशामुळे गुहागर तालुक्यासह संपूर्ण रत्नागिरी जिल्ह्याच्या शिरपेचात मानाचा तुरा रोवला गेला आहे. नाशिक येथील या भव्य पुरस्कार वितरण सोहळ्यास ग्रामविकास व पंचायत राज मंत्री जयकुमार गोरे, विधान परिषद सभापती प्रा. राम शिंदे, जलसंपदा मंत्री गिरीश महाजन, अन्न व औषध प्रशासन मंत्री नरहरी झिरवळ यांच्यासह विविध विभागांचे वरिष्ठ मंत्री आणि प्रशासकीय अधिकारी उपस्थित होते. जिल्हा परिषदेच्या मुख्य कार्यकारी अधिकारी वैदेही रानडे, खामशेतचे लोकनियुक्त सरपंच मंगेश सोलकर, गुहागर पंचायत समितीचे सभापती प्रणव पोळेकर आणि उपसभापती निलेश सुर्वे यांनी हा पुरस्कार अत्यंत अभिमानाने स्वीकारला.
या गौरवशाली सोहळ्याचे साक्षीदार होण्यासाठी उपमुख्य कार्यकारी अधिकारी सागर पाटील, गुहागरचे गटविकास अधिकारी प्रदीप शिंदे, खामशेतचे प्रशासक चंद्रकांत कारंडे, ग्रामसेवक श्री. मोहिरे यांच्यासह साईनाथ बागुल व कृष्णदेव कदम उपस्थित होते.
खामशेत ग्रामपंचायतीने स्वच्छता, शाश्वत पाणी पुरवठा, मूलभूत सुविधांचा विकास, पारदर्शक प्रशासन आणि विविध शासकीय कल्याणकारी योजनांची तळागाळातील घटकांपर्यंत केलेली यशस्वी अंमलबजावणी या सर्व निकषांवर राज्यात आघाडी घेतली आहे. सामूहिक लोकसहभाग आणि प्रशासकीय नियोजनाच्या जोरावर गावाने ग्रामविकासाचा एक नवा आदर्श उभा केला असून, त्याचीच पावती म्हणून राज्य पातळीवर या कामगिरीची दखल घेण्यात आली आहे.
साखरी त्रिशूलचे सरपंच सचिन मस्कर, झोपावेचे सरपंच आशीर्वाद पावसकर, खोडदेचे सरपंच प्रतीक पवार आणि पंचायत समिती व ग्रामपंचायतीचे इतर अधिकारी-कर्मचारी मोठ्या संख्येने उपस्थित होते. खामशेत ग्रामपंचायतीला मिळालेल्या या राज्यस्तरीय बहुमानाबद्दल सरपंच मंगेश सोलकर, सर्व ग्रामपंचायत सदस्य, ग्रामस्थ आणि गुहागर पंचायत समिती यंत्रणेचे सर्वच स्तरांतून मनःपूर्वक कौतुक होत आहे.
