Konkan Railway | कोकण रेल्वेकडून ‘स्मृती दिवस’ साजरा
रत्नागिरीतील श्रमशक्ती स्मारकावर सीएमडी संतोष कुमार झा यांनी वाहिली श्रद्धांजली
रत्नागिरी : कोकण रेल्वे कॉर्पोरेशन लिमिटेडतर्फे (Konkan Railway) दरवर्षीप्रमाणे यंदाही अत्यंत भावूक आणि शिस्तबद्ध वातावरणात ‘स्मृती दिवस’ पाळण्यात आला. कोकण रेल्वेच्या आव्हानात्मक आणि ऐतिहासिक बांधकामादरम्यान आपल्या प्राणांचे बलिदान देणाऱ्या कामगार व कर्मचाऱ्यांच्या स्मृतीस उजाळा देण्यासाठी या विशेष कार्यक्रमाचे आयोजन करण्यात आले होते.
या प्रसंगी कोकण रेल्वेचे अध्यक्ष आणि व्यवस्थापकीय संचालक (CMD) श्री. संतोष कुमार झा यांनी रत्नागिरी येथील प्रसिद्ध ‘श्रमशक्ती स्मारक’ येथे भेट देऊन पुष्पचक्र अर्पण केले व भावपूर्ण श्रद्धांजली वाहिली. या वेळी त्यांच्यासोबत कोकण रेल्वेचे वरिष्ठ अधिकारी, कर्मचारी आणि स्थानिक प्रतिनिधी मोठ्या संख्येने उपस्थित होते.
हुतात्म्यांच्या त्यागामुळेच स्वप्न साकार
कोकण रेल्वेचा मार्ग तयार करणे हे भारतीय रेल्वेच्या इतिहासातील सर्वात कठीण आणि आव्हानात्मक काम मानले जाते. कठीण डोंगर, दऱ्या, बोगदे आणि नद्यांवर पूल बांधताना अनेक निष्ठावंत कामगारांना आपले प्राण गमवावे लागले होते. त्यांच्या या अजोड त्यागामुळेच आज कोकण रेल्वेचा मार्ग सुरक्षित आणि गतिमान सेवा देत आहे, असे उद्गार या वेळी काढण्यात आले.
कार्यक्रमादरम्यान सर्व उपस्थितांनी मौन पाळून हुतात्म्यांना आदरांजली वाहिली आणि त्यांच्या योगदानाचे कायम स्मरण ठेवण्याचा संकल्प केला.
