रत्नागिरीत ऐन दिवाळीत भीषण दुर्घटना: महालक्ष्मी मॉलला आग; तीनही मजले खाक, लाखो रुपयांचे नुकसान
रत्नागिरी : रत्नागिरी शहरातील मारुती मंदिर परिसरातील के. सी. जैन नगर येथील ‘महालक्ष्मी मॉल’ला बुधवारी पहाटे पाच वाजेच्या सुमारास भीषण आग लागली. या दुर्घटनेत मॉलमधील तीनही मजल्यांवरील सर्व साहित्य जळून खाक झाले असून लाखो रुपयांचे मोठे आर्थिक नुकसान झाल्याचा प्राथमिक अंदाज व्यक्त केला जात आहे.
दिवाळीचा साठवलेला माल भक्ष्यस्थानी
दिवाळी सणाचा काळ असल्याने ग्राहकांसाठी मॉलमध्ये मोठ्या प्रमाणात नवीन माल साठवून ठेवण्यात आला होता. कपडे, भेटवस्तू आणि इतर ज्वलनशील साहित्यामुळे आगीने अवघ्या काही वेळातच रौद्ररूप धारण केले आणि ज्वाळा तिसऱ्या मजल्यापर्यंत पोहोचल्या.
अग्निशमन दलाकडून आग विझवण्याचे शर्थीचे प्रयत्न
घटनेची माहिती मिळताच अग्निशमन दलाच्या तीन गाड्या तातडीने घटनास्थळी दाखल झाल्या. सलग सुट्ट्यांमुळे कर्मचाऱ्यांशी संपर्क होण्यास अडचणी येत होत्या, तसेच आतमध्ये दाट धूर आणि मोठ्या प्रमाणावर माल साठवलेला असल्याने नगरपरिषद व अग्निशमन दलाच्या कर्मचाऱ्यांना मॉलमध्ये प्रवेश करणे आव्हानात्मक ठरले होते. चार तास उलटूनही आगीचे लोट आतून धुमसत होते.
परिसरात धुराचे साम्राज्य आणि नागरिकांमध्ये घबराट
पहाटेच्या थंडीमुळे सुरुवातीला नागरिकांना हा धूर धुक्याचा भास झाला. मात्र, काही वेळातच आगीचे भीषण स्वरूप समोर आल्यावर मारुती मंदिर ते माळनाका परिसरापर्यंत दाट धूर पसरला होता. यामुळे स्थानिक नागरिकांमध्ये आणि व्यापाऱ्यांमध्ये प्रचंड घबराट पसरली आहे.
प्रारंभिक अंदाजानुसार आग शॉर्ट सर्किटमुळे लागली असण्याची शक्यता असून, घटनेचा अधिकृत तपास आणि नुकसानीचा अचूक आकडा पंचनाम्यानंतर समोर येईल.
